“Përmirësim statusit të ushtarakut dhe nivelit të pagesave për FA”, Xhaçka: Nga dhjetori nis hartimi dhe rishikimi i strategjisë për mbrojtjen
Vijon diskutimi në Parlament për programin e qeverisës së re, ku fjalën pak minuta më pare e mori ministrja e Mbrojtjes Olta Xhaçka, ku theksin e vuri në hartimin dhe rishikimin e strategjisë së mbrojtjes, me reformat e duhura dhe me dokumentet strategjike kombëtare.
Sipas Xhaçkës, procesi i rishikimit të strategjisë së mbrojtjes do të nisë që nga muaji dhjetor. Në këtë diskutim në foltoren e Kuvendit, ministrja e Mbrojtjes foli për përmirësimin e pagesave në radhët e Forcave të Armatosura, si dhe përmirësimi i statusit të ushtarakut.
“Forcat tona të Armatosura janë rreshtuar në krah të forcave progresiste. Sfida jonë do të jetë të çojmë para bashkëpunimin me NATO dhe aleatët tanë evropianë. Politika jonë për sigurinë do të ketë në qendër të vëmendjes mbrojtjen e interesit kombëtar. Rritja e kapaciteteve nuk nënkupton vetëm më shumë burime financiare, por shpenzime të arsyeshme për specializimet në fushat avantazhuese. Një vëmendje të veçantë do t’i kushtohet flotës detare. Nevojitet një qasje e re për të përditësuar strategjinë kombëtare. Do të intensifikojmë brenda muajit dhjetor procesin e hartimit, rishikimin strategjik të mbrojtjes me reformat e duhura nga dokumentet strategjike kombëtare. Rishikimi i strategjisë së mbrojtjes synon krijimin e politikave për modernizimin e FA, ku do të kryhet në koordinim me strukturat e tjera ministrore. Në thelb do të jetë edhe përmirësimi i statusit të ushtarakut”, tha Xhaçka.
Nga ana tjetër ministrja Xhaçka foli edhe për buxhetin, ku theksoi se gjatë këtij programi qeverisës do të ketë rritje të buxhetit të mbrojtjes. Njëkohësisht foli për menaxhimin e kufijve, trajnimin dhe kualifikimin në radhët e Forcave të Armatosura.
“Do të përmirësojmë menaxhimin e kufijve për shkëmbimin ndërkombëtar të të dhënave për parandalimin e krimit, emigracionit të paligjshëm, terrorizmit, financave kriminale, etj. Modernizimi i vazhdueshëm i shërbimeve inteligjente do të jetë një tjetër objektiv. Objektiv i rëndësishëm do të jetë edhe rritja e standardeve me trajnime, kualifikime për karrierën profesionale në FA. Me rëndësi do të jetë menaxhim i burimeve njerëzore në FA, ku do të rekrutohen më të aftët për përmbushjen e misioneve të caktuara, si dhe do të rrisim motivimin e personelit, duke përmirësuar pagesat. Prioritet do t’iu jepet familjeve të ushtarakëve të dislokuar jashtë vendit. Ne do të rrisim buxhetin për mbrojtjen”, theksoi Xhaçka.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.