Përmirësimi i klimës së biznesit – Ikonomi: Nxitja e sipërmarrjes së huaj dhe vendase, prioritet i politikave të qeverisë për 2019
Vazhdimi i reformave, konsolidimit fiskal dhe ndërmarrja e politikave incentivuese për sipërmarrjen vendase dhe të huaj janë disa prej prioriteteve kyçe të qeverisë përgjatë këtij vitit.
Këtë e pohon zv.ministrja e Financave dhe Ekonomisë, Belinda Ikonomi, e cila ishte e pranishme në aktivitetin e organizuar sot nga DIHA dhe ambasada Gjermane, ku u prezantua anketa e bizneseve Gjermane për klimën e biznesit dhe investimeve për vitin 2019.
Ndërsa vlerësoi angazhimin e DIHA-s dhe Ambasadës Gjermane, Ikonomi shtoi do të bëhet analizimi i mëtejshëm i rezultateve të anketës për marrjen e masave konkrete nga qeveria.
“Unë sot jam këtu, në emër të Ministrisë së Financave dhe Ekonomisë, për të identifikuar rezultatet e këtij anketimi lidhur me pritshmërinë e Kompanive për vitin fiskal që sapo ka filluar, për të analizuar këto rezultate dhe për të vijuar me tej takime konstruktive me Ju dhe çdo përfaqësues të Shoqatës, me qëllim marrjen e masave konkrete nga ana e Qeverisë aty ku është e nevojshme”, u shpreh zv.ministrja e MFE-së.
Ndërkohë, ndërsa ka vijuar më tej me prioritetet e tjera për vitin 2019, Ikonomi nënvizoi edhe një herë si pika kyçe hartimin e mekanizmave që ndikojnë drejtpërdrejt në nxitjen e investimeve dhe në intensifikimin e përpjekjeve dhe fokusit të qeverisë për pajisjen e forcës punëtore me aftësitë e duhura në shërbim të nevojave të sektorit privat.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.