Përmirësimi i shërbimeve turistike – Arsimi profesional dhe kualifikimet, objektivat e strategjisë në dy vitet e ardhshme

Zhvillimi i modeleve të reja të vlerësimit, standardizmi, certifikimi dhe klasifikimi i shërbimeve në funksion të zhvillimit të  turizmit dhe rritjes së të ardhurave nga ky sektor janë ndër objektivat kryesore të strategjisë kombëtare të turizmit deri në vitin 2023. Në këtë aspekt strategjia po ashtu synon krijimin i Kuadrit Rregullator dhe Institucional për zhvillimin e arsimit profesional dhe kualifikimet në turizëm, si dhe trajnimi i burimeve njerëzore të angazhuara në sektor. Objektivi i kësaj strategjie është hartimi i kornizës së kualifikimeve si dhe të punohet mbi kurrikulat në mënyrë që më pas të procedohet me trajnimin e gjithë profesioneve të lidhura me turizmin si edhe të banorëve të zonave turistike.

Në zbatim të Planit Kombëtar Sektorial për Fushën e Turizmit parashikohet të hartohen planet e detajuara të zhvillimit për secilën nga këto zona dhe politika specifike për nxitjen e investimeve private në to. Ndërkaq investimet publike do të vijojnë të  orientohen drejt zonave me përparësi zhvillimin e turizmit dhe destinacioneve turistike për përmirësimin e infrastrukturës bazë në to e cila mbetet një ndër problemet më të mprehta të zhvillimit të turizmit në vendin tonë .

Nertila Doko / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.