Përmirësohen financat e Britanisë – Vendi regjistron suficit për të parën herë që prej vitit 2002
Britania ka publikuar suficitin e parë në buxhet që prej Korrikut 2002, mbështetur prej të ardhurave të forta nga pagesat e taksave, tregojnë të dhënat zyrtare. Suficiti qëndroi në 184 milionë paund, krahasuar me deficitin prej 308 milionë paund të të njëjtës periudhë një vit më parë, raporton Zyra Kombëtare e Statistikave, duke cituar të dhënat që përjashtojnë bankat e kontrolluara nga shteti.
Të dhënat treguan gjithashtu koston e inflacionit të lartë te financat publike. Pagesat e interesave të borxhit arritën në një total prej 4.9 miliardë paund në Korrik, në rritje me 18% nga e njëjta periudhë e një viti më parë. Qeveria e Britanisë ka shpenzuar 21.6 miliardë paund në interesa të borxhit në 4 muajt e parë të vitit fiskal 2017, në rritje me 23.1% me bazë vjetore.
Zyrtarët janë përpjekur prej kohësh që të përmirësojnë financat publike, që kur deficiti u rrit në 10% në raport me Produktin e Brendshëm Bruto në 2010-ën, pas krizës financiare. Që prej atëherë, deficiti ka rënë gradualisht në 2.3% të PBB në vitin fiskal 2016 që përfundoi në Mars. Megjithatë, hendeku në buxhet pritet të zgjerohet përsëri në 2.9% këtë vit.
Ministri i Financave Philip Hammond nuk ka premtuar të balancojë buxhetin deri në mesin e dekadës që vjen, duke i lënë vetes hapësirë për të mbështetur ekonominë me daljen nga Bashkimi Europian.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.