Përmirësohet besimi në ekonomi – Biznesi, të gjithë sektorët në rritje, me përjashtim të ndërtimit
Treguesi i ndjesisë ekonomike(TNE) është rritur lehtë në tremujorin e katërt të vitit 2020, duke u rritur me 6 pikë, por vijon të qëndrojë nën mesataren historike, në 81.1 pikë, tregojnë të dhënat më të fundit nga Banka e Shqipërisë. “Rritja tremujore e TNE-së pasqyroi kryesisht përmirësimin e besimit në tregti, industri dhe shërbime. Treguesi i besimit në ndërtim dhe besimi konsumator shënuanrënie të lehtë. Të gjithë treguesit e besimit vazhdojnë të qëndrojnë nën mesataret përkatëse historike”-thekson Banka e Shqipërisë në vrojtim. Sa i përket biznesit, treguesi i besimit në sektorin e shërbimeve u rrit me 7.1 pikë përqindje gjatë tremujorit të katërt.
“Ecuria e këtij treguesi pasqyroi rritjen e të dy balancave formuese të saj; ecuria e biznesit dhe kërkesa, me përkatësisht 7.2 dhe 7.1 pikë përqindje. Edhe balancat e tjera të vrojtimit si gjendja financiare, pritjet për ecurinë e punësimit në tremujorin e ardhshëm dhe norma e shfrytëzimit të kapaciteteve u përmirësuan. Norma e shfrytëzimit të kapaciteteve rezultoi 72.2%, një vlerë kjo gjithsesi më e ulët se niveli i shënuar një vit më parë dhe mesatarja historike përkatëse.
Ndërkohë, bizneset në sektorin e shërbimeve presin rënie të kërkesës në tremujorin e ardhshëm”-thotë Banka e Shqipërisë. Sektori i shërbimevve është një prej shtyllave kryesore të ekonomisë shqiptare, duke qenë se përfshin dhe turizmin, ndër më të prekurit nga kriza e shkaktuar nga pandemia. Edhe treguesi i besimit në industri si dhe ai në tregti kanë regjistruar një rritje të ndjeshme gjatë tremujorit të fundit të vitit, por duke vijuar të qëndrojnë nën mesataren historike. Sa i përket treguesve të biznesit, vetëm ai i besimit në ndërtim ka pësuar një rënie të lehtë gjatë tremujorit të 4-t, pavarësisht se treguesi i shitjeve, regjistrohet në rritje me 1.4 pikë përqindje krahasuar me tremujorin paraardhës.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.