Përmirësohet skema e rimbursimit për sipërmarrjen – 12.4 miliardë lekë për periudhën janar – nëntor

Për periudhën janar- nëntor 2017, sipërmarrja ka përfituar 12.4 mld lekë rimbursim, krahasuar me 2016 ku vlera e rimbursimit kapte shifrën e 8.9 mld lekëve.

Kështu është shprehur ministri i Financave dhe i Ekonomisë, Ahmetaj në mbledhjen e Këshillit të Investimeve ku theksoi se rimbursimet kanë qenë një problematikë e kahershme e biznesit, por evidentoi edhe një herë përmirësimin e raporteve me sipërmarrjen edhe në këtë drejtim.

“Rimbursimet kanë qenë një problematikë e kahershme e biznesit. Ju si Këshilli i Investimeve keni vënë re një përmirësim të rëndësishëm në raport me sipërmarrjen. Këtë vit janë  12.4 mld lekë të rimbursuara në periudhën janar-nëntor te krahasuar me 8.9 mld lekë të vitit të kaluar. Jemi të ndërgjegjshëm që ka shumë për të përmirësuar në skemën e rimbursimit, skema ka pësuar përmirësime të ndjeshme në favor të sipërmarrjes”, tha Ahmetaj.

Ministri në këtë takim foli edhe për rritjen ekonomike dhe uljen e nivelit të papunësisë.

“Rritja ekonomike, tashme është e konsoliduar. Ne 2018 parashikojmë rritjen në nivelin 4.2 për qind të PBB. Papunësia ka një ulje te ndjeshme me 13.9 për qind.”

os.de/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.