“Përqafomë”, kënga e 5 viteve më parë rikthehet si “himn” në Italinë e izoluar! Këngëtari: Të ardhurat, për kërkime shkencore ose një spital

Abbracciame nga Andrea Sanninno është një këngë e vitit 2015 e cila është rikthyer në memorie në këtë situatë të vështirë për të gjithë ne, e sidomos Italinë, e cila po përjeton një nga dramat më të mëdha njerëzore të shekullit.

“E atëherë po, më përqafo më fort, sepse atëherë nuk do të na interesojë nëse e gjithë koha që ka kaluar është kohë e humbur, apo nëse nesër nuk do të ekzistojë më asgjë” është një copëz nga teksti i Sanninno-s, i cili është dëgjuar të këndohet jo vetëm nga ballkonet e shtëpive dhe pallateve në Napoli apo zona të tjera të Italisë, por madje edhe vetë nga mjekët dhe infermierët në spitale.

Kjo këngë, si një mesazh shprese, force, dhimbje, apo kurajo, për të përcjellë në nota muzikore pamundësinë për t’u përqafuar me njëri-tjetrin, por dëshirën për ta bërë. Këngëtari i mallëngjyer është shprehur se nuk e priste që kënga e tij të bëhej himni i kësaj situate të vështirë për Italinë.

“E po… vetëm pas 5 viteve të gjata, e vetëm falë forcës suaj, Abbracciame është në vendin e parë në klasifikime, mes këngëve më të shkarkuara në Itali!! Do t’i kërkoj bashkëpunëtorëve të mi të dhurojnë një pjesë të fitimeve, në studime shkencore ose në një nga spitalet më të impenjuara në këtë përleshje” shkruan Sanninno në një postim në profilin e tij në Instagram.

Jenida Vladi/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.