‘Përralla’ nga kriptovalutat: Kriza e lirës nxit bumin e Bitcoin në Turqi!

Në zyrat e AltCoin, një qendër kriptomonedhash e vendosur në një rrugë anësore në lagjen e zhurmshme Kadıköy të Stambollit, dy televizorë të montuar në mur tregonin vlerën e drejtpërdrejtë të monedhave bitcoin dhe Ethereum, të dy grafikët drejtuar për poshtë. AltCoin u themelua për të mësuar qytetarët turq se si të investojnë në kriptovaluta, të cilat ofrojnë një alternativë dixhitale dhe të decentralizuar për sistemin financiar të zakonshëm.

Tregtimi i kriptomonedhave është rritur në popullaritet në Turqi gjatë një krize financiare që përgjysmoi vlerën e lirës vitin e kaluar, ndërsa inflacioni së fundmi u rrit mbi 30%, një nivel më i lartë në dy dekada. Ndërsa shumica e qytetarëve turq që kërkojnë të shmangin zhvlerësimin e kursimeve të tyre në lira priren të riinvestojnë në dollarë ose ar, një numër në rritje i investitorëve të rinj i shohin kriptovalutat si rrugën alternative.

Kjo ka tërhequr zemërimin e qeverisë, veçanërisht të presidentit Recep Tayyip Erdoğan, i cili deklaroi se “ne jemi në një luftë kundër Bitcoin” dhe së fundmi zbuloi një program për të inkurajuar qytetarët turq që të kalojnë kursimet e tyre në lira dhe të ruajnë paratë e gatshme në banka. Për besimtarët e kriptomonedhave, mungesa në rritje e besimit në zgjidhjet e qeverisë është provë se monedhat dixhitale janë alternativa më e mirë ndaj lirës së zhvlerësuar të Turqisë.

Megjithatë, nëse kriptovalutat ofrojnë vërtet një mundësi për t’u pasuruar është e paqartë. Ata si themeluesit e AltCoin thonë se nëse fluksi i investitorëve të paditur rrezikon të bie pre e mashtrimeve ose thjesht të shpërdorojë paratë e tyre, është faji i individit. Anëtarët e AltCoin – sipas vlerësimeve të tyre – kanë trajnuar më shumë se 300 njerëz që nga fillimi i qendrës pesë vjet më parë, dhe më shumë marrin pjesë në një ngjarje javore që organizojnë për të predikuar mrekullitë e kriptos.

Por ata janë të kujdesshëm se si funksionojnë në një mjedis rregullator të pasigurt, duke u përmbajtur thjesht në mësimin e njerëzve se si të tregtojnë në vend që të ndihmojnë ose diskutojnë drejtpërdrejt përfitimet e çdo monedhe. Kriptovalutat ekzistojnë në një zonë gri legale në Turqi. Qeveria ndaloi përdorimin e tyre për të paguar mallra dhe shërbime në prill të vitit të kaluar, ndërsa tregtimi i tyre është ende i lejuar.

Disa shkëmbime, ku qytetarët mund të tregtojnë lira ose zakonisht dollarë amerikanë për kriptovaluta, janë mbyllur muajt e fundit mes konfuzionit mbi statusin ligjor të tregtisë. Të tjerët janë mbyllur pas skandaleve të profilit të lartë, si bursa Thodex, e cila u mbyll pasi pronari u largua nga vendi duke marrë të paktën 2 miliardë dollarë fonde me vete. TheGuardian

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.