Përse Strasburgu ktheu 77 dosjet e pronave? – Zbardhet vendimi: Nuk janë shteruar mjetet juridike vendase, paditë e papajtueshme me Konventën

Këshilli i Ministrave ka zbardhur vendimin e Gjykatës së Strasburgut e cila ktheu në Shqipëri 77 padi të ngritura nga pronarët me justifikimin se ata nuk kanë shteruar mjetet juridike në vend. Në vendimin e zbardhur, Gjykata e Strasburgut e argumenton përgjigjen negative ndaj pronarëve shqiptarë kryesisht në 4 pika.

Së pari, Gjykata e Strasburgut konstaton, se pronarët nuk i janë referuar mjeteve të reja juridike në vend. “Kërkuesit ose nuk  kanë arritur të shterojnë mjetet juridike vendëse ose nuk kanë informuar Gjykatën për ndonjë veprim që mund të kenë ndërmarrë në lidhje me këtë.”, theksohet në vendim.

Së dyti Gjykata vëren se procedurat e brendshme, në lidhje me përcaktimin e shumës së kompensimit kanë mbetur pezull në gjykatat kombëtare. Prandaj, ajo konsideron se do të ishte e parakohshme që ajo të trajtonte këto ankime, të cilat duhet të rrëzohen sipas nenit 35§§1 dhe 4 të Konventës.

Praktika gjyqësore vijuese e Gjykatës së Lartë rikonfirmon më tej se, kur një ankim është depozituar në gjykatën më të lartë, vendimet e gjykatave më të ulëta do të marrin formë të prerë dhe do të bëhen të zbatueshme me dorëzimin e një vendimi nga Gjykata e Lartë.

Së treti, Gjykata, duke pasur parasysh pagesën e plotë të shumës së kompensimit sipas kërkesës së kërkuesve, siç përcaktohet në parashtresën e Qeverisë, nuk mund të pretendojnë më të jenë “viktimë” e shkeljeve të të drejtave të tyre, sipas Konventës.

Së fundmi, Gjykata vëren, se procedurat në vend në lidhje me njohjen fillestare të të drejtave për pronat e trashëguara të kërkuesve janë akoma pezull.

Nuk është marrë asnjë vendim I formës së prerë, nuk mund të thuhet se kërkuesit kanë “posedime ekzistuese” brenda kuptimit të nenit 1, të protokollit nr. 1.

Prandaj, Gjykata arrin në përfundimin se, për momentin, kërkuesit nuk kanë treguar se ata kanë pasur një kërkesë, e cila ishte vërtetuar mjaftueshëm për t’u zbatuar dhe për këtë arsye ata nuk mund të argumentojnë se kanë pasur një “posedim”. “Nga kjo rrjedh se ky ankim është I papajtueshëm me dispozitat e Konventës brenda kuptimit të nenit 35§3 dhe duhet të rrëzohet”, thekson Gjykata e Strasburgut.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.