Përshpejtimi i ekonomisë Rumune – Banorët nuk kanë shtuar pasuri gjatë performancës së fortë të vendit

Të mirat e të jetuarit në ekonominë me rritjen më të shpejtë në bashkimin Europian nuk janë reflektuar plotësisht te rumunët. Pavarësisht rritjes së shpejtë të Produktit të Brendshëm Bruto, ndërkohë që Qeveria ka shpenzuar ndjeshëm në rritjen e pagave në sektorin publik dhe uljen e taksave, pasuria e vendit, e matur me aktivet neto të banorëve si përqindje e të ardhurave në dispozicion, qëndron thuajse në nivelet e njëjta që kanë qenë 5 vite më parë.

Sipas analistëve, më pak rumunë po investojnë në aktive afat-gjatë si apartamentet, por më shumë në nevoja të përditshme. Sipas grupit rumun, BRD, të zotëruar me pjesën më të madhe nga huadhënësi francez Societe Generale, njerëzit po sillen sikur dorëlëshimi i Qeverisë do të zgjasë përgjithmonë. Kjo nuk ka gjasa të jetë e mundur, për shkak të paralajmërimeve nga Komisioni Europian mbi qëndrueshmërinë e defiçitit buxhetor.

“Banorët nuk kanë akumuluar pasuri në vitet e fundit, ata kanë shtuar detyrimet e tyre bazuar në pritshmëritë pozitive për vendin. Shumë njerëz as nuk kanë pritur për të parë materializimin e premtimeve dhe kanë konsumuar më shumë, por duke akumuluar më shumë borxh. Një korrigjim është i pritshëm”, deklaron institucioni.

Bashkimi Europian projekton që ekonomia do të rritet me 4.4% në 2018-ën, pas eklipsimit të rritjes së vendeve të tjera anëtare të BE-së vitin e kaluar. Inflacioni në vend ka arritur në nivelin më të lartë në 4 vite e gjysmë gjatë Dhjetorit dhe Banka Qendrore ka nisur rritjen e normave të interesit, që kanë qëndruar në nivele rekord të ulëta që prej 2015-ës.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.