Përshpejtimi i Brexit bën me “flatra” paundin britanik/ Londra zgjohet e lumtur
Mëngjesin e 13 dhjetorit, Londra u zgjua me fitoren e thellë të Boris Johnson. Batuta e parë në sallat operative të bankave ishte për dhuratën e parë të Krishtlindjeve, e cila mbërriti më herët; rritja e paundit.
Një ditë pas zgjedhjeve më të rëndësishme të pasluftës për Anglinë, paundi britanik u rrit me 2%; 1.33 në dollarë dhe 1.17 në euro. Analistët mendojnë se mund të arrijë edhe në vlerën 1.4 dollarë.
80% e PBB-së janë shërbime dhe vendasit do të paguajnë më pak për mallrat, të cilat i importon në sasi të mëdha. Nga ana tjetër, për turistët nuk është lajm i mirë, pasi Londra do të bëhet edhe më e kushtueshme për t’u vizituar.
Mirëpo, tani për tani mbizotëron euforia mbi “çlirimin” e vendit. Për tre vite, që nga qershori i vitit 2016, Mbretëria e Bashkuar kishte ngecur në ngërç. Që atëherë, paundi ishte ulur pothuajse aq sa për t’u barazuar me euron, në gushtin e kaluar.
Me 31 janar, Mbretëria e Bashkuar do të dalë nga BE, rrjedhimisht edhe nga tregtia e lirë, por ky është vetëm fillimi. Deri në 31 dhjetor 2020 është afati për të dhënë lamtumirën.
Johnson do të ketë një vit kohë për të mbyllur të gjitha marrëveshjet tregtare dhe doganore me pjesën tjetër të Europës. Madje, ai ka premtuar një Brexit të shpejtë, e 11 muaj duken pak për punën kolosale që duhet bërë.
Nëse në pranverën që vjen do të ketë vonesa në procedurat tregtare, atëherë paundi do të luhatet sërish. Gjithsesi, për momentin, Londra po kalon një fundvit të gëzueshëm. /ilsole24ore/
Jenida Vladi/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.