Perspektiva e Bankës Botërore për Azinë. Rritja më e ngadaltë në 50 vite, prej Covid-19. Mbi 38 mln njerëz, në varfëri
Pandemia e koronavirusit pritet të sjellë rritjen më të ngadaltë në mbi 50 vite në Azinë e Lindjes dhe të Paqësorit, si dhe në Kinë, ndërkohë që mbi 38 milionë njerëz pritet të rikthehen në varfëri, sipas Bankës Botërore. Banka bëri të ditur se rajoni pritet të rritet me vetëm 0.9% këtë vit, që është norma më e ngadaltë që prej 1967. Rritja në Kinë pritet në 2% këtë vit, nxitur nga shpenzimet qeveritare, eksportet e forta dhe një normë e ulët e infeksioneve me Covid-19 që prej Marsit.
Pjesa e mbetur e Azisë së Lindjes dhe të Paqësorit, pritet të tkurret me 3.5%, sipas Bankës Botërore. Pandemia dhe përpjekjet për ta përmbajtur kanë sjellë kufizim të aktivitetit ekonomik botëror. Shtetet në rajon do të duhet të ndjekin reforma fiskale për të mobilizuar të ardhura në kundërpërgjigje të goditjes së pandemisë, ndërkohë që programet e mbrojtjes sociale mund të mbështesin riintegrimin e punëtorëve. Goditja ekonomike e pandemisë pritet të sjellë gjithashtu një rritje të varfërisë, që përkufizohet me të ardhura prej 5.5 dollarë në ditë, sipas Bankës Botërore, që shton se bazuar tek të dhënat e PBB, varfëria mund të zgjerohet në 38 milionë njerëz, në rritjen e parë në 20 vite. Banka theksoi se 33 milionë njerëz do të mund të dilnin nga varfëria, në mungesë të pandemisë, këtë vit.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.