“Perspektiva Ekonomike Botërore” – FMN rrit projeksionet për 2021, pavarësisht “pasigurive të jashtëzakonshme”
Fondi Monetar Ndërkombëtar ka rritur projeksionet për ekonominë botërore në vitin 2021 dhe theksoi se rënia e shkaktuar nga koronavirusi në vitin 2020 do të jetë 1% më pak e ashpër se sa pritej. Fondi theksoi se miratimet e shumta të vaksinave dhe nisja e programit në shumë vende në Dhjetor, ka shtuar shpresat e një përfundimi gradual të pandemisë, që ka infektuar 100 milionë njerëz dhe ka lënë mbi 2.1 milionë të vdekur.
Megjithatë, organizata paralajmëroi se ekonomia botërore vazhdon të përballet me “pasiguri të jashtëzakonshme” dhe variantet e reja më infektues po shtojnë rrezikun. Rreth 90 milionë njerëz pritet të bien poshtë kufirit të varfërisë ekstreme në 2021, me pandeminë që ka fshirë progresin e 2 dekadave. Një numër i madh i madh i njerëzve janë larguar nga puna në shumë vende, përfshire Shtetet e Bashkuara.
Në raportin e fundit “Perspektiva Ekonomike Botërore”, fondi parashikoi një tkurrje globale në 2020 prej 3.5%, nga 4.4% që priste në muajin tetor, duke reflektuar vrullin më të madh se ç’pritej në gjysmën e dytë 2020. Në vitin 2021, Organizata me seli në Washington, parashikoi një rritje me 5.5%, nga 5.2% që priste më parë, pasi pritshmëritë për vaksinat kanë ofruar optimizëm në fund të vitit të kaluar.
Ekonomia e SHBA, më e madhja në botë, pritet të rritet me 5.1% në vitin 2021, 2% sipër projeksioneve të mëparshme, prej stimujve shtesë fiskalë të miratuara në Dhjetor. Kina pritet të rritet me 8.1%, ndërsa India me 11.5% këtë vit. Fondi theksoi se vendet me të ardhura të ulëta do të kenë nevojë për mbështetje nëpërmjet granteve, kredive me interesa të ulëta dhe lehtësime të borxhit.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.