“Përtej imagjinatës” – Shoqata e Bankave reagon ashpër për grabitjen
Shoqata Shqiptare e Bankave reagon ashpër për grabitjen e ndodhur në pistën e Aeroportit Ndërkombëtar të Tiranës.
Sekretari i përgjithshëm, Spiro Brumbulli, tha se ngjarja e të martës është përtej imagjinatës. Sipas tij, ajo që shqetëson më shumë se vjedhja e parave, është cenimi, për të dytën herë, i asaj që duhet të jetë ndër zonat më të sigurta të vendit. Ai tha se ngjarja e djeshme tregoi edhe njëherë që krimi vazhdon të jetë përpara organeve të ruajtjes së rendit dhe sigurisë.
Shoqata e Bankave u shpreh e zhgënjyer me punën e bërë nga kompania Tirana International Airport për garantimin e sigurisë në pistën e aeroportit. Brumbulli tha se i takon hetimit të evidentojë përgjegjësitë për ngjarjen, por u shpreh se përsëritja e grabitjes së tre viteve më parë tregon se nuk janë mësimet e duhur në lidhje me sigurinë.
Të martën pasdreke, grabitës të armatosur arritën në vidhnin një shumë të madhe parash nga avioni i kompanisë Austrian Airlines, në pistën e Aeroportit të Tiranës. Përveç cenimit të imazhit të vendit dhe dëmit direkt financiar, ngjarja mund të sjellë rritje të mëtejshme të kostove për sistemin bankar. Kompania austriake ishte e vetmja që kryente transport ndërkombëtar të vlerave monetare.
Nëse ajo tërhiqet, siç deklaruan përfaqësues të saj, atëherë bankat duhet të gjejnë zgjidhje të tjera për këtë shërbim, që me çdo gjasë do të jenë më të kushtueshme. Gjithashtu, grabitjet e shumta të bankave kanë rritur primet e sigurimit të parave në transport. Të gjitha këto kosto në fund do të paguhen nga publiku, në formën e komisioneve më të larta bankare.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.