Përurohet “Parku i Europës” – Veliaj: Përfaqëson ambicien europiane të qytetarëve

Është përuruar sot “Parku i Europës”, lulishtja më e re pas monumentit të Heroit Kombëtar në Sheshin “Skënderbej”. Kryetari i Bashkisë së Tiranës, Erion Veliaj, i shoqëruar nga Drejtori i Përgjithshëm për Zgjerimin në Komisionin Europian, Chrisitan Danielsson, Ambasadorja e BE Romana Vlahutin si dhe përfaqësues të vendeve anëtare të Bashkimit Europian në vendin tonë mbollën pemë në këtë lulishte në kuadër të Ditës së Europës.

Sipas Veliajt, ky park i cili tashmë është një hapësirë e dedikuar tërësisht për njerëzit, përfaqëson ambicien europiane të qytetarëve të Shqipërisë.

“Arsyeja pse e ka Parku Europa është se është ngjitur me Sheshin Skëndërbej, sepse unë besoj që ambicia jonë europiane daton që në kohën e Skënderbeut ose ndoshta edhe më tej. Edhe nga ana e urbanistikës, pjesën e zhurmës, të qejfit dhe rrëmujës e kemi në shesh, pjesën e paqes dhe qetësisë dhe të rregullit e kemi te Parku i Europës.”

Më tej ai tha se vetë Bashkia e Tiranës përfaqëson në një farë mënyrë Bahskimin Europian, pasi sipas tij një pjesë e madhe e stafit që punojnë për të implementuar projekte të ndryshme në qytet kanë sjellë eksperiencat e tyre si studentë apo emigrantë në Europë.

“Një pjesë e konsiderueshme e stafit tonë ka ardhur fillimisht si emigrant apo si student në vendet tuaja dhe sot është kthyer për të shërbyer në Bashkinë e Tiranës. Tregon eksperiencat që përmblidhen në atë godinë dhe në punën e Bashkisë së Tiranës falë gjithë atyre që kanë jetuar në Europë dhe e kanë sjellë një copë të Europës për ta implementuar në Tiranë”, tha Veliaj.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.