Pesha e ndërtimit në ekonomi – Prek 3% të PBB në 2017, vetëm Tirana kontribuon me 1.5%

Në të gjithë vendin gjatë 2017-ës janë dhënë leje ndërtimi për një vlerë prej rreth 48 miliardë lekësh, ç`ka përkthehet në rreth 365 milionë euro. Të paktën kjo është vlera që vetë ata që kanë aplikuar për leje ndërtimi, të cilët mund te jenë ndërtues apo edhe privatë, kanë deklaruar gjatë aplikimit. Një vit më parë kjo shifër fiksohej në vetëm 190 milionë euro përafërsisht.

Kjo shifër ka tendencën të jetë sa më afër realitetit me ndërtuesit apo privatët të nxitur të mos e fryjnë apo ulin shifrën e preventivit. Leje ndërtimi që kapin vlerën e 365 milionë eurove në një vit janë një shifër mjaft domethënëse, duke pasur parasysh edhe madhësinë e ekonomisë shqiptare.

Kjo shifër përkthehet në një kontribut vjetor në Prodhimin e Brendshëm Bruto prej thuajse 3%. Ky është kontributi i drejtpërdrejtë i  ndërtimit në ekonominë shqiptare, pa llogaritur këtu një sërë vlerash të tjera që shtohen në zinxhirin e prodhimit të një ekonomie si pasojë e ndërtimit.

Pjesën dërrmuese të kësaj shifre, rreth 185 milionë euro, pra më shumë se gjysmën e zë Tirana. Kjo përkthehet në një  kontribut të drejtpërdrejtë në ekonomi prej rreth 1.5%.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.