Peticioni i pazakontë: Femrat jo më me taka në zyrë

Një fushatë nëpër mediat sociale kundër rregullave të veshjes sidomos të takave për gratë në ambjentet e punës është bërë virale në Japoni, duke bërë që mijëra persona t’i bashkohen lëvizjes #KuToo. Rreth 20,000 gra kanë nënshkruar një peticion në internet duke kërkuar që qeveria të ndalojë kompanitë nga kërkesa që punonjëset femra të veshin taka të larta në punë.

Fushata #KuToo, një lojë-fjalë për këpucë dhe “kutsu” në japonisht për fjalën dhimbje, u nis nga aktorja dhe shkrimtarja e pavarur Yumi Ishikawa, e cila paraqiti peticionin në Ministrinë e Shëndetësisë të hënën. Ajo e filloi fushatën pasi u detyrua të mbante taka të larta për një punë me kohë të pjesshme në një sallë funerale, duke përftuar një mbështetje të madhe nga gratë.

“Pas punës, të gjithë veshin atlete apo shapka”, shkruante ajo në peticion, duke shtuar se takat e larta mund të shkaktojnë deformim të këmbës dhe tendosje në pjesën e poshtme të shpinës. Është e vështirë të lëvizësh, nuk mund të vraposh dhe këmbët të lëndohen. Të gjitha për shkak të rregullave”, shkruante ajo, duke thënë se burrat nuk përballën me të njëjtat fenomene.

Në dekadat e kaluara, biznesmenët pritej të mbanin kollare, por kjo ndryshoi që kur qeveria nisi një fushatë “biz cool” në vitin 2005 për të inkurajuar kompanitë që të ulin kondicionerët dhe të reduktojnë përdorimin e energjisë elektrike. Tani, shumë biznesmenë dhe zyrtarë të qeverisë nuk i mbajnë kollaret në punë.

Peticioni synon t’i japë fund diskriminimit gjinor dhe “ta bëjë më të lehtë për të gjithë të punojnë, duke krijuar një mjedis pune pa barra të panevojshme”. Ministria e shëndetësisë tha se ishte duke shqyrtuar peticionin dhe nuk pranoi të komentojë më tej.

Burimi: Euronews

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.