Pfizer do të lejojë 95 vende në zhvillim ta prodhojnë dhe ta shesin vetë pilulën e saj kundër Covid!
Kompania amerikane e barnave Pfizer ka nënshkruar një marrëveshje për të lejuar pilulën e saj eksperimentale të trajtimit Covid-19 të prodhohet dhe të shitet në 95 vende në zhvillim.
Marrëveshja e mbështetur nga OKB-ja mund ta bëjë trajtimin të disponueshëm për 53% të popullsisë së botës por përjashton disa vende që kanë pasur shpërthime të mëdha të Covid-19, përfshirë Brazilin. Pfizer thotë se pilula zvogëlon rrezikun e sëmundjeve të rënda tek të rriturit vulnerabël.
Në një deklaratë të martën, Pfizer tha se marrëveshja do t’i lejojë prodhuesit vendas të ilaçeve të prodhojnë pilulën “me qëllimin e lehtësimit të aksesit më të madh për popullsinë globale”.
Pfizer nuk do të marrë honorare për shitjet në vendet me të ardhura më të ulëta dhe tha se do të heqë dorë nga to në të gjitha kombet e përfshira në marrëveshje ndërsa Covid mbetet një emergjencë e shëndetit publik e caktuar nga Organizata Botërore e Shëndetësisë.
Në fillim të nëntorit, Pfizer tha se provat klinike sugjerojnë se pilula e saj Covid-19, Paxlovid, ul rrezikun e shtrimit në spital ose vdekjes me 89% për pacientët e rritur me rrezik të lartë.
Shumica e vendeve të përfshira janë në Afrikë ose Azi. Megjithatë, vende si Brazili, Kina, Rusia, Argjentina dhe Tajlanda, të cilat kanë përjetuar shpërthime të mëdha, nuk janë pjesë e marrëveshjes.
Disa ekspertë thonë se kjo nuk mjafton për të trajtuar pabarazitë në aksesin në trajtimet dhe vaksinat Covid-19. Pfizer dhe kompanitë e tjera farmaceutike kanë kundërshtuar gjithashtu thirrjet për heqjen e patentave për dozat e tyre Covid.
‘Mjekët pa Kufij’ thanë se ishin të “i zhgënjyer” që marrëveshja nuk i bën pilulat Covid-19 të Pfizer të disponueshme kudo në botë. BBC
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.