Pfizer e Moderna, “të preferuarat’’ e vendeve të pasura – Astrazeneca dhe J&J më pak të preferuara për shkak të efekteve anësore
Qeveritë e vendeve të pasura po kërkojnë të sigurojnë më shumë doza të vaksinës kundër COVID-19 nga Pfizer dhe Moderna për të mbajtur programet e tyre të vaksinimit pa u prekur nga gjithë problematikat që kanë paraqitur në raport me efektshmërinë nga AstraZeneca dhe Johnson & Johnson.
Vendet në Europë dhe Azi, si dhe Afrikën e Jugut, po kufizojnë ose ndalojnë përdorimin e AstraZeneca për shkak të shqetësimeve lidhur me efektet anësore që kjo vaksinë ka paraqitur tek disa individë të cilët kanë marrë dozën e parë të vaksinës.
Përhapja e vaksinës me një dozë të J&J u ndalua në Shtetet e Bashkuara dhe Europë këtë javë për shkak të rritjes së numrit të rasteve që patën mpiksje të gjakut shumë të rrallë, por të rrezikshëm në tru, njëjtë si vaksina e AstraZeneca. Administrata Amerikane e Ushqimit dhe Barnave tha se po studion nëse teknologjia që është përdorur për prodhimin e këtyre dy vaksinave ishte e lidhur me rastet e mpiksjes së gjakut.
Të dyja këto teknologji kanë në përbërje të vaksinës, koncentrat nga virusi si vektor për të dhënë proteina të koronavirusit në qeliza dhe për të nxitur një përgjigje imune. Të kombinuara, të dy vaksinat supozohet se përbëjnë më shumë se 25% të furnizimit global përgjatë 2021, sipas raporteve.
Vaksinat nga Pfizer me partnerin gjerman BioNTech dhe Moderna përdorin një metodë tjetër për tu mbrojtur nga COVID-19 që mbështetet në mesazhin RNA, për të programuar qelizat dhe për të gjeneruar imunitet ndaj koronavirusit. Këto dy prodhime janë parë tashmë si një zgjedhje e parë midis vendeve të pasura, thonë analistët, bazuar në të dhënat e provave klinike që tregojnë se ato ishin më shumë se 90% efektive në parandalimin e COVID-19 simptomatike. Rreth 120 milion amerikanë kanë marrë një dozë nga vaksina e Pfizer ose Moderna deri më tani pa identifikuar ndonjë efekt anësor shqetësues.
Tanimë, Shtetet e Bashkuara dhe Bashkimi Europian po bëjnë presion për të grumbulluar edhe më shumë vaksina të Pfizer dhe Moderna. Japonia po punon gjithashtu për të siguruar 100 milion doza të Pfizer-it deri në fund të qershorit.
Ndërkaq, Moderna dhe Pfizer kanë deklaruar se po punojnë për të rritur prodhimin mbi objektivat e tyre të prodhimit për vitin 2021 përkatësisht deri në 1 miliard. Pfizer këtë javë tha se po synon një rritje prej 10% në dërgesat e dozave amerikane deri në maj dhe 50 milion doza më shumë për Europën në tremujorin e dytë të 2021. BE po negocion gjithashtu për deri në 1.8 miliardë doza Pfizer për 2022 dhe 2023.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.