Pfizer sjell 15 mijë vaksina të tjera. Rama: Në mars, 14 mijë vaksina nga Covax. Sezoni i ardhshëm turistik me rënie drastike infektimesh
Mbrëmjen e djeshme mbërritën në Aeroportin Nënë Tereza 15 mijë e 210 doza të vaksinave Pfizer. Kryeministri Edi Rama i cili ndodhej në aeroport së bashku me Ministren e Shëndetsisë dhe Mbrojtjes Sociale Ogerta Manastirliu, u shpreh se ëeshtë marrë konfirmimi nga Pfizer që Shqipëria do të marrë 30 mijë doza për muajin prill dhe skeduli do të vijojë çdo muaj pa ndërprerje. “Pra është zgjidhur problem i boshllëkut që ishte krijuar mes dy fazave” tha kryeministri. Po ashtu, kryeministri tha se janë konfirmuar 14 mijë dozat e para nga Astra Zeneca përmes Covax brenda mesit të muajit mars.
“Nga ana tjetër po punojmë me disa burime të tjera dhe absolutisht jam shumë besimplotë që do të kemi së shpejti mundësinë e vaksinimit masiv brenda gjithë territorit për të thyer në vazhdimësi intensivisht të gjithë zinxhirin e infektimit dhe për ta bërë këtë sezon të ardhshëm turistik një sezon me infektime në rënie drastike, dhe në të cilin Shqipëria mund të jetë e hapur për të gjithë ata që duan të vijnë. Kjo është sfida dhe ju lutem durim, sepse është një luftë e madhe tregtare që zhvillohet ditën dhe natën dhe ne nuk jemi mbrapa askujt. Durim!” tha kryeministri në deklaratën e tij.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.