Pfizer, vetëm 39% efikase ndaj variantit Delta / Të dhënat nga Izraeli sugjerojnë se vaksina sërish ofron mbrojtje të fortë
Vaksina e Pfizer dhe BioNTech kundër Covid-19 është vetëm 39% efektive në Izrael, ku varianti Delta është dominant, por sërish ofron mbrojtje të fortë kundër sëmundjeve të rënda apo shtrimeve në spital, sipas një raporti të Ministrisë së Shëndetësisë në vend. Të dhënat mbi efikasitetin, që bazohen në një numër të paspecifikuar njerëzish mes 20 qershorit dhe 17 korrikut, janë më poshtë se vlerësimi i mëparshëm që tregonte një efikasitet prej 64% dhe bien ndeshme me të dhënat nga Britania e Madhe që treguan një efikasitet prej 88% kundër simptomave të shkaktuara nga varianti Delta i koronavirusit. Megjithatë, dy dozat e vaksinës funksionojnë shumë mirë në parandalimin e sëmundjeve serioze, pasi rezulton në një efektivitet prej 88% kundër shtrimeve në spitale dhe 91% ndaj sëmundjeve të rënda. Varianti Delta është dominant në më shumë se 104 vende të botës dhe po shqetëson zyrtarët e shëndetësisë pasi po infektohen edhe njerëzit e vaksinuar plotësisht, pavarësisht se simptomat janë të lehta. Për këtë arsye, shefi mjekësor i Shtëpisë së Bardhë, Anthony Fauci, dekaloi se njerëzit e vaksinuar plotësisht mund të konsiderojnë mbajtjen e maskave në ambientet e mbyllura, si një masë paraprake kundër variantit Delta që po përhapet me shpejtësi në Shtetet e Bashkuara dhe në shumë vende të tjera të botës. Në veçanti, ekspertët e shëndetësisë janë të shqetësuar për stinën e vjeshtës, kur Delta pritet të godasë sidomos vendet me nivele të ulëta të vaksinimit.
Lidion Kulla – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.