Pikat e skrapit – Rregulla të reja për funksionimin e tyre
Pikat e grumbullimit të skrapit në vendin tonë janë kthyer në problematikë për ndotjen mjedisore. Për të shmangur ndikimet e tyre në mjedis Ministria e Turizmit dhe Mjedisit, brenda muajit janar të 2018-ës në bashkëpunim me vendorët do të përcaktojë rregullat e reja për funksionimin e një pike grumbullimi skrapi.
Kjo është një ndër masat që po merr ministria në kuadër të operacionit “të pastrojmë Shqipërinë”, i cili parashikohet të zgjasë 6 muaj.
28 nga 180 pika grumbullimi skrapi janë mbyllur vetëm pak kohë më parë në Tiranë për shkak të mos zbatimit të lejes mjedisore. Ndërkohë problematikë ngelet edhe zbatimi i lejes mjedisore nga Gurorët, 99% e tyre në vendin tonë funksionojnë pa e zbatuar lejen . Kjo sipas Ministrit Klosi është pasoja e mungesës së një udhëzimi në ligjin ekzistues për mbetjet e riciklueshme i cili ka krijuar një vakum që shfrytëzohet nga këto biznese që funksionojnë pa asnjë kriter.
Lidhur me lejet mjedisore, kreu i Agjencisë Kombëtare të Mjedisit, Edison Konomi u shpreh për televizionin SCAN se do të nis kontrolli edhe për licencat e studiove ligjore mjedisore të cilat bëjnë vlerësimet e ndikimit në mjedis për të shmangur abuzimet.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.