Pjesëmarrja ekonomike e femrave – Më punëtoret në rajon, por të parafundit në poste drejtuese
Në Shqipëri vetëm 22.6% e pozicioneve menaxheriale i takojnë grave dhe vajzave, pra më pak se ¼. Këtë e thotë një raport i fundit i publikuar nga Organizata për Bashkëpunim Ekonomik dhe Siguri. Raport në tërësinë e tij trajton çështjen e dhunës ndaj grave në Europën jug-lindore dhe lindore. Sa i përket pranisë së grave dhe vajzave në poste drejtuese, me 22.6%. Shqipëria rezulton të jetë e parafundit në rajon, me Bosnje Hercegovinën që mban vendin e fundit me një normë në 22%.
Për Serbinë norma ngjitet në 30% ndërkohë që për Moldavinë dhe Ukrainën i kalon 40%. Pjesëmarrja ekonomike e grave dhe vajzave vlerësohet kështu mjaft e ulët në këtë aspekt. Por, kur flitet për pjesëmarrjen e grave dhe vajzave në tregun e punës, Shqipëria ka normën më të lartë në rajon, me 49.8%, dhe të dytën më të lartë mes vendeve të marra në analizë, pas Ukrainës. Një në dy gra ose vajza shqiptare, mbi 15 vjeç rezulton të jetë aktive në tregun e punës, pra ose e punësuar ose punëkërkuese, si në asnjë vend tjetër të Ballkanit Perëndimor. Me 32.4%, Bosnje Hercegovina ka normën më të ulët në rajon në këtë drejtim.
Një tjetër studim i Organizatës Ndërkombëtare të Punës, ILO, nënvizon faktin se femrat me arsim të lartë të avancuar kanë më shumë shanse se meshkujt për të pasur vende pune në poste drejtuese. Në Shqipëri norma e grave dhe vajzave me arsim të lartë në poste drejtuese fiksohet në pak më shumë se 39%, ndërkohë që te burrat dhe djemtë fiksohet në rreth 36%.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.