Pjesëmarrja në konkurrimin publik – Peshkimi, “shkrihen” dokumentet, nevojitet vetëm një plan biznesi
Ministria e Bujqësisë i ka dhënë prioritet sektorit të peshkimit, përmes mbështetjes me subvencion dhe hartimit të politikave me qëllim zhvillimin e tij si sektor me potencial të lartë. Gjatë këtij viti do të vihen në zbatim disa iniciativa që synojnë lehtësimin e sektorit dhe reduktimin e burokracisë. Fokus i veçantë i Ministrisë është reforma e derregullimit, ky synohet reduktimi i dokumenteve në kufij minimale.
Kështu, iniciativa më e fundit, për të cilën do të ketë dhe ndryshime në ligj, është ajo e konkurrimit publik. Nëse më parë subjekteve që merrnin pjesë në një konkurrim të hapur nga Ministria për projekte të ndryshme, u duhej të dorëzonin një dosje me dokumente dhe të kishin kontakt fizik me punonjësit, së shpejti do të jenë të “çliruar” nga kjo barrë.
Për të marrë pjese në konkurse publike në sektorin e peshkimit, nga 20 dokumente që kanë qenë deri më tani, subjekteve do tu duhet të dorëzojnë vetëm një plan të detajuar biznesi, i cili do të hidhet online dhe do të jetë lehtësisht i aksesueshëm. Do të jenë punonjësit e Ministrisë ata që përmes regjistrit elektronik të gjenerojnë dokumentet e nevojshme dhe të bëjnë verifikimet e duhura për subjektin.
Sektori i peshkimit është regjistruar me rritje të eksporteve gjatë vitit që lamë pas në rreth 30 për qind, për shkak të investimeve në sektor dhe formalizmit.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.