Planet Territoriale të paprekshme? – Qeveria ndryshon rregullat, lejon korrigjimin e kateve dhe lartësive të ndërtimeve
Ndërsa Planet Territoriale janë detyrim ligjor për t’u zbatuar pikë pas pikë nga çdo dikaster apo njësi vendore, Këshilli i Ministrave ka përcaktuar se ato mund të korrigjohen në rast se evidentohen gabime në llogaritje, në gjendjen faktike në terren, madje edhe kur behet fjalë thjesht për gabime drejtshkrimore. Më 17 prill Këshilli i Ministrave ka miratuar disa shtesa e ndryshime në vendimin e vitit 2017 “Për Miratimin e Rregullores së Planifikimit të Territorit” me propozimin e ministrit të Infrastrukturës dhe Energjisë.
Njëra prej shtesave parashikon “Korrigjimin e dokumentit të planifikimit” për rastet kur konstatohen: gabime drejtshkrimore; dy ose më shumë parashikime të ndryshme për të njëjtën zonë/njësi strukturore në dokumente të ndryshme përbërëse të planit; mospërputhje e treguesit të lartësisë në kate me atë të lartësisë në metra; mospërputhje të përcaktimeve në dokumentin e planifikimit me gjendjen faktike të zhvillimeve në territor.
Korrigjimi do të mund të bëhet përmes një procedure shumë të thjeshtë. Autoriteti përgjegjës për planifikimin e territorit përgatit një relacion shpjegues dhe njofton Agjencinë e Planifikimit të territorit për konstatimet. Agjencia, në bashkëpunim me autoritetin përgjegjës për planifikimin, shqyrton dhe vlerëson rastet e konstatuara. Në përfundim të këtij procesi, Agjencia dërgon në KKT kërkesën për miratimin e vendimit për korrigjimin e dokumentit të planifikimit, shoqëruar nga një relacion shpjegues. Vendimi hyn në fuqi pas botimit në Regjistrin Kombëtar të Planifikimit të Territorit.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.