Plani i shpenzimeve i Greqisë – S’ka më ulje të pensioneve në 2019, 965 mln euro masa pozitive
Qeveria greke deklaroi se nuk do të ulë pensionet në datën 1 Janar, ndërsa paketa e masave pozitive e listuar në projekt-buxhet, do të jetë sipër vlerës prej 765 milionë euro që u vlerësua fillimisht. Bazuar në planin e shpenzimeve që Ministria e Financave ka dërguar te Komisioni Europian në datën 15 Tetor, masat pozitive që Qeveria greke do të aplikojë në vitin 2019, vlerësohen në rreth 965 milionë euro.
Ndër këto përfshihen: prezantimi i një skeme të subvencionimit të qirasë dhe strehimit, bazuar në të ardhurat dhe prona; Reduktim në kontributet e sigurimeve për të vetëpunësuarit dhe fermerët me 33% si dhe aplikimi i një baze të të ardhurave minimale për pensionet dhe përfitimet suplementare. Paketa e re do të subvencionojë kontributet në sigurimet sociale për punonjësit e rinj, deri në 24 vjeç, duke mbuluar 100% të kontributeve të punonjësve dhe 50% për punëdhënësit.
Ndër masa të tjera lehtësuese përfshihen: reduktimi i Taksës Uniforme të Pronave të Paluajtshme (ENFIA) me 10% si dhe reduktimi i taksës ndaj të ardhurat për personat ligjorë në 25% nga 29%, në një horizont 4 vjeçar. Paketa e re do të reduktojë gjithashtu taksat ndaj dividentëve, duke ulur normën ndaj fitimeve të pashpërndara me 5%, si dhe përmirësimin e edukimit profesional dhe shkollave të trajnimit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.