Plani i tunelit më të gjatë nëntokësor nuk po shkon mirë- Estonia kërkon më shumë detaje
Plani për të ndërtuar tunelin hekurudhor më të gjatë nën tokë duket të ketë ndjerë pengesat e para. Ky tunel pretendohet të lidhë dy kryeqytetet e Estonisë dhe Finlandës, të cilët i ndan një distancë më e madhe se 100 kilometra.
Mirëpo, Estonia kërkon më shumë detaje mbi financimin e projektit, planin e biznesit si dhe vetë rolin e Finlandës. Pa pasur këto qartësime, duket se kombi i Baltikut, nuk do të japë dritën jeshile për të vazhduar përpara.
“Ne kemi nevojë për një kuptim të qartë se nga vijnë paratë dhe në çfarë shume. Ku është garancia që do të përfundojë? Iniciatori nuk ka arritur të përgjigjet sesi vlerësohet vëllimi i njerëzve që do të udhëtojnë atje “ tha Ministri Estonez i Ekonomisë, Taavi Aas, në një intervistë.
“Nëse sipërmarrësit e projektit thonë që nuk duan garancinë apo përfshirjen e qeverisë, atëherë nuk do të lejojmë në asnjë mënyrë të fillojnë të gërmojnë tunelin” shtoi Ministri Estonez.
Nga ana tjetër, Qeveria e Finlandës nuk e ka diskutuar projektin e tunelit dhe ky i fundit nuk është pjesë e programit politik të vendit. Megjithatë, pritet që Estonia dhe Finlanda të nënshkruajnë një memorandum mirëkuptimi brenda pak kohësh.
Jenida Vladi/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.