Plani i Veprimit për aftësinë e kufizuar – Dokumenti për 5-vjeçarin/ Kosto totale 11.8 milion euro, hendeku financiar 22%
Ministria e Shëndetësisië dhe Mbrojtjes Sociale ka nxjerrë për konsultim publik Planin Kombëtar të Veprimit për Personat me Aftësi të Kufizuar 2021-2025, një dokument që përfshin politika të dedikuara për këtë kategori e që do të duhet të zbatohet gjatë 5-vjeçarit të ardhshëm. Dokumenti rendit një sërë qëllimesh, duke nisur nga realizimi i aksesueshmërisë në mjedise, shërbime, transport dhe informacion për personat me aftësi të kufizuara. Sipas dokumentit, për objektet në varësi të MSHMS-së, rezulton se nga 400 objekte te kontrolluara, vetëm 34% ofrojnë akses, por jo të gjitha në përputhje me standardet.
Një tjetër qëllim është rritja e pjesëmarrjes në tregun e punës dhe nxitja e mundësive të barabarta për punë të denjë, ku sipas dokumentit pavarëissht se ka një progress në këtë fushë, punësimi i personave me aftësi të kufizuara vazhdon të mbetet në nivele shumë të ulta. Paralelisht, një nga qëllimet e Planit 5-vjeçar të Veprimit është sigurimi dhe ofrimi i arsimit gjithëpërfshirës dhe cilësor për të gjithë fëmijët me aftësi të kufizuara. Sipas dokumentit ka një rritje të konsiderueshme të mësuesve ndihmës, ndërkohë që sfidat e mëtejshme lidhen kryesisht me funksionimin dhe fuqizimin e sistemit të gjithëpërfshirjes.
Plani i Veprimit ka për qëllim edhe garantimin e aksesit të barabartë në sistemin e drejtësisë, përmirësimin e cilësisë së jetës nëpërmjet shërbimeve/përfitimeve të aksesueshme, të përballueshme financiarisht dhe që kanë në qendër klientin, ofrimin e një kujdesi shëndetësor të aksesueshëm e të përballueshëm për këtë kategori, etj. Kostoja për zbatimin e këtij plani veprimi është 1.46 mld lekë ose 11.8 mln Euro, ku pesha më e madhe zihet pikërisht nga kujdesi shëndetësor i aksesueshëm e të përballueshëm me 24.5% të totalit. Qëllimi i Politikës për rritjen e aksesit është 19.7% e totalit, ndërsa ofrimi i arsimit gjithëpërfshirës 14.9 % e totalit. Megjithatë, në dokument raportohet një hendek financiar prej 22%. Buxheti i shtetit parashikohet të financojë zbatimin e planit në masën 71% të financimit të nevojshëm, ndërsa 7% pritet të financohet nga donatorë dhe burime të tjera.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.