Plani Kombëtar 2020-2022 – Përmirësimi i qeverisjes nëpërmjet angazhimit të shoqërisë civile
Shoqëria civile do të jetë pjesë e Planit të Veprimit të Shqipërisë OGP 2020-2022. Ky angazhim synon të përmirësojë qeverisjen përmes bashkëpunimit për të zhvilluar reforma që promovojnë transparencën, llogaridhënien publike dhe pjesëmarrjen qytetare. Sipas planit të veprimit të publikuar në faqen zyrtare të konsultimeve publike, bëhen të qarta dhjetë angazhimet në reforma të organizatave të shoqërisë civile për përfshirjen në Planin e Veprimit të Shqipërisë OGP 2020-2022.
Temat kryesore të planit të veprimit janë përzgjedhur të jenë antikorrupsioni, qeverisja dixhitale , aksesi në drejtësi dhe transparenca fiskale. Bazuar në strategjitë dhe prioritetet e qeverisë si dhe komentet apo idetë e nxjerra nga konsultimet me palët e interesit gjatë këtij viti, janë përcaktuar nëntë objektiva strategjike të cilat fokusohen kryesisht në rritjen e aksesit në shërbimet publike dhe rritjen e përgjegjësisë përmes qasjeve të koordinuara për të përmirësuar cilësinë e informacionit për publikun.
Përmirësimi i qeverisjes përmes bashkëpunimit duke mundësuar pjesëmarrjen qytetare pritet të rrisin, krahas besimit të publikut, mundësitë për përmbushjen e prioriteteve në rrugën e integrimit të Shqipërisë për në Bashkimin Evropian.
Nertila Doko / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.