Plazhet më të bukura në Shtetet e Bashkuara të Amerikës
Të gjithë e duan plazhin dhe secili në mënyrën e tij. Dikush preferon detin, dikush tjetër kërkon të pushojë në çadër, të pijë koktejle dhe të ndiejë rërën nën këmbët e tij.
Megjithatë kur mendon për plazhet më të bukura, të vijnë në mendje pothuajse vetëm brigjet e Mesdheut apo Karaibet. Por vendet e bukura gjenden kudo, përfshirë edhe në SHBA, ku ndodhen këto 12 plazhe mbresëlënëse.
Plazhi i Rërës Jeshile, Papakolea, Havai
Për të mbërritur në këtë plazh në Ishullin e Madh të Havait duhet një marshim rreth 9 kilometra mes shkëmbinjve. Në fund të rrugës, kodra harkohet brenda në det, ndërsa plazhi merr një ngjyrë jeshile për shkak të mineralit të olivinës.
Dunat e arinjve të fjetur, në Michigan
Ky plazh pranë liqenit krenohet me duna prej rëre të thjeshta për t’u ngjitur, ku vizitorët mund të ndërtojnë kala rëre, të notojnë, të bëjnë sporte apo të mbledhin manaferra të egra. Por gjatë rrugës duhet pasur kujdes nga arinjtë, kastorët, rrëqebujt dhe vidrat.
Ishulli Assateague, Maryland
Bregu 60 kilometra i gjatë i ishullit Assateague është i mbushur me 150 vende kampingu dhe 79 kuaj të egër. Vendi është perfekt për të bërë banjo diell në verë, por ruajtësit e parkut sugjerojnë një vizitë në vjeshtë, kur ofrohen programe yoga dhe peshkimi.
Bandon, Oregon
Natyra është padyshim e egër në plazhet pranë Bandon, Oregon. Yjet e detit, kërmijtë dhe anemonat me gjemba gjenden në shkëmbinjtë në det.
Plazhi Shi Shi, Parku Kombëtar Olimpik, Uashington
Ndryshe nga plazhet e mbipopulluara, Shi Shi mund të arrihet vetëm përmes një ecjeje prej 3 kilometrash përmes pyllit. Ky është një nga ato vende që mund të duash t’i mbash për vete dhe mos t’ua tregosh të tjerëve.
Homer Spit, Alaska
Sikur të mos mjaftonte bukuria e të shëtiturit buzë oqeanit me pamje nga malet e mbuluara nga bora, ky plazh gëlon nga salmoni, të cilin mund ta shijoni në një nga restorantet vendase.
Liqeni McDonald, Parku Kombëtar i Akullnajës, Montana
Plazhet me guralecë shumëngjyrësh e bëjnë Liqenin McDonald perfekt për një zhytje në verë. Liqeni ka 16 kilometra ujë të kristaltë, i cili reflekton majat me dëborë të maleve përreth.
Siesta Key, Florida
Rëra e Siesta Key është shumë e butë. Mijëra vite më parë, një copëz e madhe kuarci u nda nga maja e malee Appalachian. Minerali u copëzua në pjesë më të vogla teksa përshkoi përronj, lumenj dhe mbërrit më në fund në det. Rëra është tashmë 99% kuarc dhe gjithmonë e freskët.
Plazhi i topave të bowlingut, Kaliforni
Brigjet e këtij plazhi janë pushtuar nga një fenomen gjeologjik, ku gurët sedimentarë dhe mineralet e ngurta janë lëmuar nga deti. Efekti është një plazh ku duket sikur gjigantët kanë lënë përgjysmë një lojë me topa mermeri.
Plantacioni i Gjirit Botany, ishulli Edisto, Karolina e Veriut
Zona është hapur për publikun në vitin 2008 dhe peizazhi mbizotërohet nga myshku, fusha luledielli dhe moçale aligatorësh. Nëse e vizitoni gjatë zbaticës, do të dalloni pemë që zhyten në det dhe guaska gjigante varen nga degët e tyre. Gjatë rrugës do të dalloni edhe fëmijë të ishullit që shesin mjaltë.
Plazhi Ke’e, Kauai, Havai
Këtu pylli tropikal në mal shkrihet me detin. Ishulli është i mbushur me guva të izoluara dhe shkëmbinj koralorë, rërë të butë, si dhe perëndime mbresëlënëse.
Ishulli Block, Rhode Island
Shkallët e pjerrëta dhe të thepisura zbresin në shpatin e një shkëmbi drejt një plazhi fantastik të frekuentuar nga njerëz që bëjnë piknik dhe sërfista.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.