PNUD, progresi njerëzor në rënie – “Shqipëria me shifra më optimiste, indeksi rritet me 22.3% në dekadën e fundit”

Progresi njerëzor  është në rënie, në mbarë globin . Ky është rezultati më i fundit i publikuar nga PNUD, Programi i Kombeve të Bashkuara për Zhvillim,  përmes një matje të re të progresit njerëzor, i cili ilustron sfidën e trajtimit të çështjeve të varfërisë dhe të pabarazisë, duke lehtësuar njëkohësisht edhe trysninë e ushtruar mbi natyrën .  Sipas këtij raporti, më shumë se 50 vende në mbarë botën  dalin nga grupi me zhvillim shumë të lartë njerëzor,  gjë që pasqyron varësinë e tyre nga lëndët djegëse fosile dhe gjurmën  e konsumit të lëndëve të para.

Fronti i ardhshëm për zhvillimin njerëzor, sipas PNUD, do të na kërkojë të bashkëpunojmë me natyrën dhe jo të veprojmë kundër saj, ndërkohë që transformojmë normat dhe vlerat sociale, si dhe incentivat shtetërore e financiare. Duke u bazuar në të dhëna të 2019-ës, Vlera e Indeksit të Zhvillimit Njerëzor për vendin tonë është 0,795, çka e klasifikon vendin në kategorinë e zhvillimit të lartë njerëzor, duke e pozicionuar në vendin e 69 nga 189 vende dhe territore. Nga viti 1990 deri në vitin 2019, vlera e këtij progresi, sipas raportit të PNUD   është rritur  me 22.3 %  kjo duke u bazuar në shifra më optimiste sa i takon jetëgjatësisë, shkollimit , pabarazisë etj.

Nga viti 1990 deri në vitin 2019, jetëgjatësia në lindje në Shqipëri është rritur me 6,7 vjet, mesatarja e viteve të shkollimit është rritur me 2,3 vjet dhe vitet e pritura të shkollimit janë rritur me 3,1 vjet. PNUD vëren se, vlera e Indeksit të Pabarazisë Gjinore në Shqipëri e rendit atë në vendin e 42-të nga 162 vende në indeksin për vitin 2019. Në Shqipëri 29,5 për qind e vendeve në parlament janë zënë nga gratë dhe 93,7 për qind e grave në moshë madhore kanë arritur të paktën një nivel arsimi të mesëm, krahasuar me 92,5 për qind për meshkujt. Pjesëmarrja e grave në tregun e punës është 46,7 për qind krahasuar me 64,6 për qind për burrat.

Nertila Doko / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.