“Po e trajtojnë si fëmijë” – Këshilltarët e gënjejnë Trump duke i thënë se rezulton i pari nëpër sondazhe, e kundërta është e vërtetë
Zyrtarët e fushatës së Trump janë duke e mashtruar presidentin, duke i thënë se ai rezulton më mirë nëpër sondazhe, sesa rezulton në të vërtetë, ka thënë një zyrtar republikan për New York Times.
Republikan, i cili foli me Times në kushte anonimiteti, tha se disa ndihmës “po shtrembërojnë me qëllim peizazhin zgjedhor për të llastuar zotin Trump, një trajtim që mund t’i bëhet vetëm një fëmije.”
Zyrtari kujtoi një bisedë ku ndihmësit e siguruan Trump se po performonte mirë në Maine, një shtet i lëkundur në zgjedhje, kur në fakt Trump atje është mbrapa kandidatit demokrat Joe Biden me shifra dyshifrore, sipas sondazheve të fundit.
Zyrtarët e fushatës, sipas Times, besojnë se prapa rënies së figurës së Trump është përgjigjja e gabuar e presidentit ndaj krizës së koronavirusit, protestat kundër racizmit të George Floyd dhe raportet e fundit që pretendojnë se ai nuk pranoi të ndërmarrë veprime pasi u informua nga inteligjenca amerikane se Rusia ishte duke paguar për sulme ndaj trupave amerikane në Afganistan.
Në vazhdën e protestave të George Floyd, Trump ka refuzuar të dëgjojë këshillat e ndihmësve për të moderuar mesazhin e tij në mënyrë që të depërtojë tek votues të pavarur, raportoi NBC News, duke shtuar deklaratat përçarëse dhe raciale.
D.B – SCAN
Burimi: Business Insider
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.