Po tani çfarë do të ndodhë? Basha: Përballje me të gjitha format e mënyrat. Nga ky moment, përballje pa kthim

Opozita ka përcaktuar një kurs të ri të aksionit politik. Në daljen për mediat, kreu i Partisë Demokratike Lulzim Basha tha se vendimi unanim është përballje me të gjithë format dhe mënyrat deri në momentin që të realizohet kthimi në demokraci e të realizohen zgjedhje të lira e të ndershme.

“Pyetja është tani se çfarë do të ndodhë? Do të pranohet që grushti i shtetit të çohet deri në fund e të instalohet tirania e krimit?

Apo do të ketë një përballje totale popullore për ta mposhtur. Vendimi unanim i opozitës është përballje me të gjitha format dhe mënyrat që do të thotë se që nga ky moment, ne jemi e do të jemi çdo ditë e çdo minutë bashkë me qytetarët të bashkuar si asnjëherë më parë, në një përballje pa kthim me ushtarët dhe shërbëtorët e juntës kriminale në pushtet derisa të diktojmë kthimin tek demoktracia, zgjedhjet e lira dhe të ndershme.

Nuk mund të kursehet asgjë në këtë beteje. Kush ul kokën dhe nuk bëhet pjesë e kësaj beteje do të jetë shërbëtor dhe skllav i krimit sepse skenari tjetër është që Shqipëria përfundimisht të bjerë si demokraci, si shtet i së drejtës e juntë kriminale. Këtë skenar nuk mund ta lejojmë dhe betejën do të vazhdojë ditë për ditë duke e intensifikuar, duke e ngritur çdo ditë e më lartë derisa të përmbysim këtë juntë” tha Basha.

Protesta e radhës së njoftuar nga opozita është me 25 maj.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.