Policët afër pensionit – Fishta: Punësimi në struktura të tjera pas daljes në pension, jo diskriminim
Sindikata e punonjësve të policisë së shtetit kërkon që efektivët e policisë afër moshës së pensionit të mos diskriminohen. Në një intervistë për televizionin SCAN, kreu i kësaj sindikate, Sadedin Fishta ka reaguar ndaj deklaratës së kryeministrit Edi Rama pak ditë më parë lidhur me krijimin e një kompanie shtetërore shërbimi për ruajtjen e objekteve ku pritet të punësohen punonjës policie afër moshës së pensionit.
Fishta nënvizon se punësimi duhet bërë pasi këta punonjës të dalin në pension ose me një pagë më të lartë se ajo që janë duke marrë, në të kundërt ata diskriminohen. Kreu i sindikatës foli dhe për efektet financiare apo sociale që pritet të ketë kjo nisëm në radhët e policive private.
Sipas Fishtës, ende ka mangësi në ligjin aktual për trajtimin me pension të punonjësve të policisë së shtetit duke i kërkuar qeverisë të nxjerrë aktet nënligjore. Kategoria e cila parashikohet të punësohet pranë kësaj strukture i përket moshës 55 vjeç e cila përbën rreth 35% të policisë së shtetit.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.