Policia e Shtetit bën gati rikonstruksionet – Nga ndërtimi i dy godinave në Shkodër tek rikonstruksioni i komisariatit të Sarandës
Janë 6 objekte dhe godina në funksion të Policisë së Shtetit që do t’i nënshtrohen punimeve të rikonstruksionit apo ndërtimit. Drejtoria e Përgjithshme e Policisë ka hapur ditën e premte procedurat për shërbimin e studimit dhe projektimit të këtyre objekteve me një fond limit prej 13.3 milionë lekësh.
Në kryeqytet parashikohet rikonstruksioni i Poligonit të Mbyllur në repartin e Ndërhyrjes së Shpejtë në Vaqarr. Po ashtu do të rikonstruktohet edhe objekti ku do të akomodohet Instituti i Policisë Shkencore në Sauk, si edhe parku i antenave në Fushë-Dajt.
Në Sarandë parashikohet rikonstruksioni i Komisariatit të Policisë. Ndërkohë që në Shkodër do të ndërtohet Reparti i Ndërhyrjes së Shpejtë, pasi ambientet ekzistuese konsiderohen tejet të amortizuara. Po në qarkun e Shkodrës do të ndërtohet edhe godina e Drejtorisë Vendore të Kufirit dhe Migracionit.
Pas shpalljes së kompanisë fituese të këtij tenderi, kjo e fundit do të ketë kohë deri në 1 Dhjetor 2018 për të kryer shërbimin e studimit të projekteve të mësipërme, në mënyrë që të mund të nisin me shumë gjasa vitin tjetër edhe punimet.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.