Policia “kreh” Tiranën- Arrestohen hajdutët e makinave dhe pronari i një lokali ku luhej bixhoz. Një tjetër, se tentoi të korruptonte policin
Policia e Shtetit njofton se ka evidentuar dhe goditur një rast të zhvillimit të lojërave të fatit dhe vënies në dispozicion të lokalit për zhvillimin e tyre. Njëkohësisht, evidentohet dhe sekuestrohet lëndë narkotike dhe armë e ftohtë. Pronari i lokalit ku ushtrohej veprimtaria e paligjshme është arrestuar.
“Shërbimet e Komisariatit të Policisë Nr. 6 Tiranë, mbi bazën e informacioneve të marra në rrugë operative se në ambientet e një lokali “Bar kafe”, në rrugën “Konferenca e Pezës” ushtrohej aktiviteti i paligjshëm i lojërave të fatit dhe i shpërndarjes e përdorimit të lëndëve narkotike, kanë ushtruar kontroll të befasishëm në lokalin e shtetasit D. Sh.
Gjatë kontrollit, Policia gjeti nje sasi lënde, e dyshuar si cannabis sativa, një valixhe me 340 çipsa, disa palë letra bixhozi, një mjet prerës thikë dhe dy targa automjetesh. Në përfundim të veprimeve, u bë arrestimi në flagrancë i shtetasit D. Sh., 27 vjeç, banues në Tiranë” njofton Policia.
Po ashtu, Policia njofton se ka finalizuar operacionin e koduar “Shëtitësit e natës”.
Referuar njoftimit zyrtar, janë kapur dhe arrestuar në flagrancë 2 shtetas, në tentativë për të vjedhur një automjet.
“Në vijim të punës për parandalimin e vjedhjeve të automjeteve, zbardhjen e atyre të ndodhura më parë, si dhe për kapjen dhe arrestimin e autorëve, shërbimet e Komisariatit të Policisë Nr. 3, pas kallëzimit të bërë nga pronari i makinës dhe mbi bazën e informacioneve të grumbulluara, kanë organizuar dhe finalizuar operacion policor “Shëtitësit e natës”.
Si rezultat i operacionit, u bë e mundur kapja dhe arrestimi në flagrancë, në tentativë për të vjedhur automjetin në pronësi të shtetasit E. S., në rrugën “Mujo Ulqinaku”, i shtetasve: V. K., 31 vjeç dhe E. H., 32 vjeç (i dënuar më parë për vjedhje), të dy banues në Tiranë.
Në bazë të hetimeve dhe të provave materiale (pamjeve filmike dhe dëshmi) rezulton se këta shtetas janë autorë të vjedhjes së një automjeti, në muajin shtator, në rrugën “Bogdanët”. Vijon puna për zbardhjen e vjedhjeve të tjera, të cilat dyshohet se janë kryer nga këta shtetas” njofton Policia.
Po ashtu, në kryeqytet është arrestuar edhe drejtuesi i një automjeti që tentoi të korruptonte policin rrugor. Referuar njoftimit zyrtar, drejtuesi i mjetit me iniciale A. S., 31 vjeç, pas verifikimit se mjeti që ai drejtonte rezultonte debitor me 17 masa administrative të pashlyera, me qellim shmangien e sanksioneve ligjore të parashikuara për shkeljen, i ka ofruar agjentit verifikues një shumë të caktuar lekësh.
Ai është arrestuar rrugorët e kryeqytetit në kushtet e flagrancës, për veprën penale “Korrupsion aktiv ndaj personave që ushtrojnë funksione publike”.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.