Policia Rrugore e Tiranës publikon raportin javor, rreth 600 masa administrative të vendosura çdo ditë

Policia Rrugore e Tiranës ka publikuar raportin për javën dhe fundjavën që lamë pas.

Kontrollet e shtuara janë fokusuar në drejtim të parkimeve të gabuara, sjelljeve në raport me sinjalizimin rrugor horizontal dhe vertikal, garave me shpejtësi, drejtimit të mjetit nën efektin e alkoolit apo në gjendje të dehur, shpejtësisë mbi normat e lejuara etj.

Sipas njoftimit të Policisë janë ndërmarrë rreth 4000 masa administrative në total nga ku një pjesë vijnë nga raportimet e qytetarëve.

Në funksion të detyrave të përcaktuara në Planet e Veprimit, janë kapur në kushtet e flagrancës 26 drejtues mjetesh, nga të cilët 8 për drejtim mjeti në gjendje të dehur, 17 për drejtim mjeti pa leje drejtimi dhe 1 për trafikim të mjeteve motorike.

Janë pezulluar 111 leje drejtimi, nga të cilat 33 për drejtim mjeti nën efektin e alkoolit, 42 për shpejtësi mbi normat e lejuara dhe 36 për shkelje të tjera të rregullave të qarkullimit rrugor.

Janë proceduar administrativisht 25 drejtues mjetesh për gara me shpejtësi, 6 prej të cilëve u është bllokuar automjeti, pasi dyshohet për ndërhyrje dhe modifikime në sistemin e zhurme shkarkuesit.

Përgjatë javës janë proceduar administrativisht 1 767 drejtues mjetesh, për qëndrim dhe pushim të mjeteve në kundërshtim me sinjalizimin rrugor.

Si dhe janë vendosur 2 050 masa administrative për shkelje të tjera të rregullave të qarkullimit rrugor.

Policia Rrugore e Tiranës, falënderon qytetarët për bashkëpunim dhe i fton ata të denoncojnë në numrin 112 dhe Komisariatin Dixhital çdo shkelje të kodit rrugor, me qëllim parandalimin e aksidenteve dhe rritjen e parametrave të sigurisë rrugore.

Nebi Xhomaqi / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.