Policia Rrugore shton kontrollet në fundjavë – Drejtuesit e mjeteve të transportit publik ‘shembullorë’, asnjë shkelje

Policia Rrugore e Tiranës ka intensifikuar kontrollet gjatë fundjavës, ku kanë vënë nën shënjestër edhe mjetet e transportit publik në orët e vona me qëllim verifikimin e alkoolit dhe shkeljeve të tjera gjatë transportit.

Sipas Policisë, vetëm gjatë një ore u kontrolluan dhe u verifikuan 22 mjete të kësaj kategorie ku nuk u konstatua asnjë rast nën efektin e alkoolit.

Ndërkohë, kontrolle u ushtruan edhe në rrugën ineterurbane Tiranë-Durrës për parandalimin e aksidenteve.

Prej orës 20:00 të mbrëmjes së të premtes e deri në orën 02:00 të mëngjesit të sotëm janë konstatuar 21 raste të tejkalimit të shpejtësisë deri në dyfish mbi normën e lejuar.

Sipas Policisë, shpejtësia varionte nga 150km/h deri në 176km/h, duke u kthyer kështu në rrezik të mundshëm për sigurinë e jetës.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.