Policia sekuestron 3.6 milion euro dhe 4 milion dollarë të falsifikuara në universitetin e Sofjes
Policia sekuestroi kartëmonedha të falsifikuara me cilësi të lartë të prodhuara në një zyrë shtypi në një universitet në kryeqytetin e Bullgarisë, bën me dije autoritetet zyrtare.
Në një operacion të përbashkët me Shërbimin Sekret të SHBA, policia Bullgare ndaloi dy persona – punonjës në universitet – dhe sekuestroi një makinë shtypi dhe pajisje për shtypjen e parave, së bashku me sasi të mëdha dollarësh amerikanë të falsifikuar dhe kartëmonedha euro.
Zyra e prokurorit tha se shuma e parave të falsifikuara të marra ishte 4 milion dollarë dhe 3.6 milion euro.
Policia beson se dy të dyshuarit janë pjesë e një ndërmarrje më të madhe kriminale, që merret me trafikimin e dollarëve të falsifikuar në Ukrainë dhe euro në Europën Perëndimore. Zbulimi “nënkupton veprimtari kriminale në shkallë të gjerë”, u tha gazetarëve Lubomir Yanev, drejtori i departamentit për luftimin e krimit të organizuar.
Të dy të dyshuarit, një burrë 48 vjeç dhe një grua 54 vjeç, bënin paratë e rreme pas punës dhe gjatë pushimeve. Ata paguheshin me 10% të falsifikimeve që prodhonin, të cilat në shikim të parë ishin me “cilësi relativisht të mirë”, sipas Yanev.
Ata nuk kishin rekorde penale. Policia e Sofjes tha se ata nuk kishin asnjë provë që zyrtarët e universitetit ishin në dijeni të ekzistencës së punëtorisë në mjediset e tyre. Sipas zyrës së prokurorit, ky është një nga operacionet më të mëdha të parave të falsifikuara në Bullgari. (EN)
E . S / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.