Politika fiskale jo të përshtatshme – “Shuhen” mbi 4 mijë biznese
Rreth 4 mijë sipërmarrës janë detyruar t’i vendosin kyçin biznesit të tyre në dy vitet e fundit, duke lënë pa punë një numër të lartë personash.
“Politikat fiskale jo favorizuese, ekonomia jo ligjore apo edhe kamatat e larta të kredive, janë disa nga faktorët që kanë ndikuar që një numër i konsiderueshëm i bizneseve në Kosovë të shuhen”, thonë përfaqësues të bizneseve.
Sipas të dhënave zyrtare, në Kosovë janë të regjistruara mbi 150 mijë biznese. Ndërsa vetëm në vitin 2016, sipas të dhënave të Agjencisë për Regjistrimin e Bizneseve, nga 10 mijë e 500 biznese të regjistruara, janë shuar 2379.
Nga hulumtimi i kryer nga Aleanca Kosovare e Biznesit, vihet re që në dy vitet e fundit janë shuar mbi 4 mijë biznese.
“Aleanca Kosovare e Biznesit ka realizuar një hulumtim të trendit të sipërmarrësve për vitit 2000 – 2016 dhe trendi i rritjes së regjistrimit të bizneseve është parë se është rritur, por edhe trendi i shuarjes së bizneseve ka shënuar rritje, dhe kjo gjendje paraqet shqetësim për vendin”, tha Kryetari i Aleancës Kosovare të Biznesit Agim Shahini, për REL.
Shahini nënvizon se janë shumë faktorë që kanë ndikuar në shuarjen e bizneseve. “Mungesa e subvencioneve për bizneset fillestare dhe për bizneset në zgjerim, interesi i lartë bankar, informaliteti i lartë në Kosovë, monopolet e krijuara nga disa biznese të mëdha dhe të fuqishme si dhe energjia elektrike që për bizneset është më e shtrenjtë, kanë paraqitur disa nga problemet e shuarjes së bizneseve”.
Këto biznese të cilat janë shuar dhe të cilat janë anketuara nga Aleanca Kosovare e Biznesit, nënvizon Shahini, kanë pasur dy ose tre të punësuar, gjë që, sipas tij, ka ndikuar edhe në rritjen e papunësisë në vend. Papunësisë në Kosovë kap shifrën e afër 28 për qind.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.