Politika nuk mban “faturën” e biznesit, Shalsi: Shkak, situata e acaruar! Tabaku: Duhet një sistem i ri fiskal!

Ndërsa sipërmarrjet amerikane janë të pakënaqura me aktivitetin e tyre ekonomik në Shqipëri, qeveria ia faturon fajin situatës së tensionuar politike nga opozita, ndërsa pranon që sërish ka ende për të bërë në drejtim të përmirësimit të klimës së biznesit. Ndërsa opozita ofron një politikë tërësisht të re fiskale, bazuar në taksën e sheshtë, eliminimin të ndryshimeve ligjore, me qëllim zgjidhjen e problemit të konkurrencës së pandershme dhe të informalitetit.

“Ajo që i bashkon të gjitha sondazhet është situata e acaruar politike, e cila dëmton sipërmarrjen. Unë besoj se kriza e sajuar politike e fillim vitit të kaluar që detyroi opozitën me një akt të paprecedentë të braktisë parlamentin, pastaj të dezertojë nga zgjedhjet e qershorit nuk ishin zgjedhja e duhur.” – u shpreh z.Shalsi.

Ndërkohë znj.Tabaku bëri të qartë se indeksi bëri të qartë besimin e opozitës se klima e biznesit është përkeqësuar:

“Ne e kemi pasur besimin se ka pasur një përkeqësim të vazhdueshëm këto 7 vite. Këto tregues na e vërtetojnë akoma më shumë këtë besim dhe të bëjnë të mendosh për një politikë të re fiskale, për një taskë të sheshtë, pra për një rikonceptim të marrëdhenieve të biznesit me qeverinë dhe me shtetin është ajo që duhet. Një qeveri e madhe që ekziston sot e mbushur me institucione pafund dhe që ka rregulla fiskale pafund dhe të cilat ndryshohen papritur, pa lejuar bizneset që t’i parashikojnë krijojnë pikërisht probleme, duke filluar që nga mungesa e konkurrencës, tek monopolet dhe oligarkizimi i tepërt i ekonomisë.”

Dhoma Amerikane e Tregtisë e  cila ka në anëtarësi 222 kompani me një xhiro vjetore 2.8 miliardë dollarë në vit dhe 38 mijë të punësuar,  ka bërë publik indeksin vjetor të klimës së biznesit në vend,  duke ngritur shqetësimet më të mprehta me të cilat përballen këto subjekte.

Elisabeta Dosku / SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.