Politika, “ushqimi” i shqiptarëve – Eurobarometri: 53% e tyre e kanë si diskutim kryesor nëpër tavolina, rekord europian

Eurobarometri,  i publikuar nga Komisioni Europian, jep një panoramë të qartë të perceptimit dhe gjendjes së shqiptarëve. Të dhënat që dalin në pah janë tepër interesante. Ajo që bien në sy mes qindra të dhënave që dalin në pah nga Eurobarometri, është dëshira e angazhim i madh i shqiptarëve për të diskutuar për politikën, gjë që lidhet fort edhe me situatën në të cilën ndodhet vendi. Të pyetur se kur ulen për të biseduar me të afërt, apo miq a diskutojnë për çështje politike, më shumë se gjysma e shqiptarëve, ose më saktë 53% e tyre,  i përgjigjen me shpeshherë.

Kjo është padiskutim norma më e lartë në të gjithë kontinentin e vjetër, ku në analizë nuk merren vetëm vendet e Bashkimit Europian, por edhe ato kandidate si dhe vendet e Efta-s. Krahasuar me të njëjtën periudhë të vitit të kaluar, rritja është mjaft e lehtë, me vetëm 1 pikë përqindje, por që sërish është tregues. Me 23% të shqiptarëve që diskutojnë shpeshherë çështje që lidhen me politikën europiane, shqiptarët janë sërish në krye të listës, paçka se jo të parët. Vetëm holandezët, Ukrainasit, danezët, turqit e gjermanët diskutojnë më shumë për politikën europiane mes tyre, se sa shqiptarët. Pra, në të gjitha vendet e tjera europiane që nuk janë pjesë e kësaj liste, politika europiane është një çështje që diskutohet më pak se në Shqipëri.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.