Politikat monetare në 2018 – Përveç Japonisë, bankat qendrore pritet të vijojnë tkurrjen monetare
Viti 2018 po afron dhe bankat qendrore në SHBA, Mbretërinë e Bashkuar, Eurozonë dhe Japoni kanë sinjalizuar planet e tyre. Me performancën e fortë ekonomike në SHBA për 2017-ën, analistët presin 3 rritje të normës bazë të interesit në vitin që vjen. Eurozona ndodhet në periudhën më të mirë që prej krizës financiare, me rritjen ekonomike që ka tejkaluar normën në SHBA.
Në tremujorin e tretë 2017, 19 vendet e valutës së përbashkët patën rritje me 0.6% nga tremujori i kaluar dhe me 2.5% me bazë vjetore. Aktualisht, tregjet nuk presin që Banka Qendrore Europiane të rrisë normat e interesit për 2018-ën dhe institucioni ka lënë hapur mundësinë e rritjes së stimujve, nëse situata përkeqësohet. Në Tetor, banka lajmëroi reduktimin e blerjeve mujore nga 60 mld euro, në 30 miliardë, duke nisur nga janari dhe zgjatur të paktën deri në Shtator.
Sipas analistëve të Nomura, inflacioni në Eurozonë do të rritet në vitin që vjen, duke vendosur presione të banka që të frenojë më tej stimujt monetarë. Një nga sfidat për vitin që vjen, është rezultati i zgjedhjeve në Itali, për shkak të rritjes së prezencës së partive populiste.
Banka e Anglisë, ndërsa rriti normën bazë të interesit në Nëntor për të parën herë në një dekadë, lajmëroi se planifikon të tkurrë politikat monetare në mënyrë graduale. Për rrjedhojë, tregjet presin vetëm një ndërhyrje në vitin që vjen. Megjithatë, analistët flasin për 2 rritje të normës së interesit, kryesisht prej Brexit.
Ndryshe nga homologët, Banka e Japonisë nuk është në nxitim, duke parë edhe lëvizjet e pakta në çmime në ekonominë e tretë më të madhe të botës. Banka ka caktuar një normë interesi në afat-shkurtër prej minus 0.1% dhe ka shënjestruar yieldet e titujve 10-vjeçar të borxhit në 0%.
Sipas analistëve, Banka e Japonisë është më e thjeshta për t’u parashikuar. Ndërkohë që inflacioni qëndron i ulët, institucioni nuk pritet të lajmërojë ndonjë përfundim të stimujve, ndërkohë që përpiqet të shmangë edhe vlerësimin e valutës vendase.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.