Politikë e re për zhvillimin rural – Peleshi: Ndërhyrje në 100 fshatra, nxitje e agroturizmit
Ministria e Bujqësisë do të ndjekë një politikë të re për zhvillimin rural dhe agroturizmin, ku përpos ndërhyrjeve në infrastrukturë dhe shërbime që janë parashikuar në 100 fshatra të vendit, aktivitetet e ndryshme me tipologji të zonave ku zhvillohen, do të jenë një element tjetër për nxitjen e turizmit. Ministri Niko Peleshi, deputetë të zonës dhe përfaqësues të ndryshëm lokale, u bënë pjesë e festës lokale të zhvilluar në Rehove të Kolonjës, duke e cilësuar si një model që do të ndiqet vazhdimisht.
“Ky aktivitet shumë interesant, që në fakt bën pjesë në një politikë të re, që ne duam të fillojmë përsa i përket zhvillimit rural. Pra, jo një politikë me fjalë të mëdha por një politikë të ngjarje të vogla si kjo, por që sjellin shumë energji, krijojnë energji, sjellin trafik, pra sjellin vizitor dhe rrisin të ardhurat lokale. Rehova, edhe pse e meriton, hyri në gjerdanin prioritar për zhvillim pra, në 100 fshatrat”, tha Peleshi.
Gjithashtu, programi “100 fshatrat” do të financojë drejtpërdrejt biznese në këto zona, kryesisht sipërmarrje që operojnë në fushën e agroturizmit, për t’i dhënë hov zhvillimi të këtij sektori në veçanti si dhe rritjes së ekonomive lokale në këto zona, ku një pjesë e mirë e fshatrave të përzgjedhur, pavarësisht potencialeve që ofrojnë, kanë vuajtur nga mungesa e investimeve dhe varfëria.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.