Porosi rekord për Note 8/650.000 aparate për vetëm 5 ditë, niveli më i lartë për seritë Note
Samsung Electronics deklaroi se porositë fillestare të aparatit Galaxy Note 8 kanë shënuar nivelin më të lartë për seritë Note, apo 2.5 herë më të larta se ato të paraardhësit Note 7.
Samsung synon që me pajisjen e re të mbrojë sundimin e tregut ndërkohë që konkurron me iPhone-in e ri të Apple, që përkon me 10-vjetorin e produktit.
Shitjet e Note 8 nisën në Shtetet e Bashkuara, Korenë e Jugut dhe vende të tjera ditën e Premte të javës që kaloi.
Në një periudhë 5-ditore, porositë për Note 8 arritën në 650 mijë produkte nga 40 vende të ndryshme, duke treguar se përgjigja fillestare ishte inkurajuese, tha DJ Koh, presidenti i Samsung Electronics.
Aparati është pasardhës i Note 7, ku bateria difektoze solli heqjen e produktit nga tregu në vetëm 2 muaj pas lancimit, gjë që rezultoi në miliarda dollarë kosto.
Reputacioni i Samsung, prodhuesit më të madh në botë të smartphone, morri një goditje, megjithatë kompania vendosi se do të mbajë linjën Note pas një sondazhi se konsumtorët i kanë qëndruar besnikë produktit.
Note 8, me një çmim prej 930-960 dollarë në SHBA, nis epokën e re të këtyre pajisjeve dhe analistët presin që t’i bashkohet edhe iPhone me 1,000 dollarë apo më shumë.
Në Kinë, Note 8 pritet të rimëkëmbë performancën e prodhuesit më të madh në botë, ndërkohë që kompani të tjera si Huawei, Vivio dhe Xiaomi reduktuan pjesën në treg të Samsung në vetëm 3% gjatë periudhës Prill-Qershor.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.