Porositë për “Made in Germany” – Bien ndjeshëm në Janar prej dobësimit të kërkesës nga jashtë
Kërkesa e dobët nga jashtë ka shkaktuar një rënie më të madhe se sa pritej në porositë industriale të Gjermanisë gjatë Janarit, gjë që tregon se fabrikat në ekonominë më të madhe të Europës mund të pësojnë ngadalësim në muajt që vijnë.
Mbyllja e fabrikave gjatë Krishtlindjeve dhe pushimeve të Vitit të Ri shpjegojnë gjithashtu këtë rezultat. Kontratat për mallrat “Made in Germany” ranë me 3.9% në Janar, pas rritjes me 3% në Dhjetor, sipas Zyrës Federale të Statistikave. Treguesi shënoi nivelin më të ulët që prej Janarit 2017 dhe rezultoi poshtë projeksioneve të analistëve.
Ministria e Ekonomisë deklaroi se tendenca e përgjithshme në porositë industriale është ende pozitive, pavarësisht rënies së Janarit. Kërkesa nga Jashtë ra me 4.6% në Janar, nxitur nga rënia e porosive me 6% nga vendet e Eurozonës.
Porositë për mallrat kapitale ranë me 5%, kërkesa për mallrat e ndërmjetëm, me 3.3% ndërsa prodhuesit e mallrave të konsumit regjistruan një rritje me 2.4%.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.