Portali për qeverisjen e hapur, më shumë akses për qytetarët – Hapet tenderi me vlerë 83.7 mln lekë

Agjencia Kombëtare e Shoqërisë së Informacionit ka hapur procedurat e tenderimit për ndërtimin e portalit për qeverisjen e hapur, opendata.gov.al.

Ky portal i cili ka për qëllim dhënien e aksesit të qytetarëve ndaj të dhënave qeveritare është parashikuar të jetë pjesë e portalit qeveritar e-Albania. Përmes tij synohet gjithashtu rritja e transparencës dhe e angazhimit publik në qeverisje.

Bazuar edhe nga praktikat ndërkombëtare, ofrimi i të dhënave të hapura fokusohet te disa fusha të rëndësishme, të cilat do të grupohen sipas tre drejtimeve, që përfshijnë: grupin e të dhënave të përgjithshme, të dhënave me impakt social si dhe të dhënave inovatore.

Më pas secili prej drejtimeve do të përfshijë të dhëna nga sektorë dhe fusha të ndryshme. Rritja e transparencës konsiston jo vetëm bazuar mbi krijimin e këtyre portaleve, por edhe në ofrimin e të dhënave përmes faqeve zyrtare të institucioneve.

Fondi limit i parashikuar për zbatimin e këtij projekti kap vlerën e 83.7 milionë lekëve, i cili përfshin financimin për vitin 2018 dhe katër vitet në vazhdim.

18 qershori 2018 është edhe afati i fundit për dorëzimin e ofertave nga operatorët ekonomikë të interesuar. Ndërsa, lidhur me zbatimin e tyre është parashikuar një periudhë prej 150 ditësh duke nisur që nga nënshkrimi i kontratës.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.