Portat e Ferrit: Ky zjarr ka 50 vjet që digjet, por më në fund do të shuhet!
Jo të gjithëve u bën përshtypje fakti se vendi më i njohur ndërkombëtarish i Turkmenistanit njihet si “Portat e Ferrit”. Presidenti i vendit, Gurbanguly Berdymukhamedov thuhet se ka urdhëruar mbylljen e vendit, i cili zyrtarisht quhet Krateri Darvaza sipas qytetit ku ndodhet. Krateri u formua në fillim të viteve 1970, kur toka u shemb gjatë një ekspedite sovjetike të shpimit të gazit. Shkencëtarët thuhet se ndezën zjarrin në vrimën masive për të parandaluar përhapjen e gazit natyror dhe që atëherë ajo ka qenë duke u djegur.
Megjithëse krateri është bërë një atraksion turistik, Berdymukhamedov thuhet se i ka kërkuar kabinetit të tij që të gjejë një mënyrë për të mbyllur portat proverbiale, sipas gazetës shtetërore Neytralny Turkmenistan. Janë dhënë disa arsye për shuarjen e zjarrit të famshëm: efekte negative në shëndetin e njerëzve që jetojnë aty pranë; shpërdorimi i burimeve të vlefshme të gazit natyror; dhe dëmtimi mjedisor.
Sipas gazetës, zëvendëskryeministri i Turkmenistanit “u udhëzua që të mbledhë shkencëtarë dhe nëse është e nevojshme, të tërheqë konsulentë të huaj dhe të gjejë një zgjidhje për shuarjen e zjarrit”. Gazi natyror është një nga burimet kryesore të të ardhurave të vendit të Azisë Qendrore. Aktualisht, nuk dihet një afat kohor për mbylljen e kraterit të Darvazës apo shuarjen e zjarrit.
Turizmi është ende një industri relativisht e vogël në Turkmenistan. Numri i vizitorëve të huaj vjetor para pandemisë vlerësohej në dhjetëra mijëra. Një aeroport i ri, modern i Ashgabatit me një terminal gjigant në formë zogu u hap në vitin 2006. Projekti kushtoi 2.3 miliardë dollarë dhe synonte të rriste profilin ndërkombëtar të Turkmenistanit. Sipas indeksit vjetor të Lirisë së Shtypit Botëror të përpiluar nga grupi Reporterët pa Kufij, Turkmenistani renditet 178 nga 180 vende në botë për censurën e medias. CNN
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.