Portugalia në rimëkëmbje – Ekonomia rritet për të 15-in tremujor radhazi

Ekonomia e Portugalisë u rrit me 2.8% në tremujorin e dytë krahasuar me të njëjtën periudhë një vit më parë, duke mbajtur normën më të lartë të rritjes në një dekadë falë kërkesës së fortë të brendshme dhe investimeve.

Ekonomia ka lënë pas periudhën e krizës së borxhit në vitet 2011-2014, duke u rritur tashmë me një normë më të madhe se e gjithë Eurozona.

Ministri i Financave, Mario Centeno, tha se rimëkëmbja është bërë e qëndrueshme, ndërkohë që ekonomia është rritur për të 15-in tremujorë radhazi.

Përmirësimi i aktivitetit ekonomik ka çuar nivelin e papunësisë në rënie këtë vit dhe ka nxitur besimin e konsumatorëve në nivelet më të larta që prej vitit 1997. Turizmi i fortë ka ndikuar gjithashtu.

“Kontributi i kërkesës së fortë të brendshme ka qenë më i fortë se në tremujorin e kaluar, për shkak të përshpejtimit të investimeve”, deklaroi Zyra Kombëtare e Statistikave me publikimin e të dhënave.

Qeveria ka dhënë një parashikim të rritjes ekonomike prej 1.8% për këtë vit, ndërsa Banka e Portugalisë e pret në 2.5%. Megjithatë, rritja me bazë tremujore u ngadalësua në 0.2%, nga 1% që ishte në të parin.

Tremujori i tretë pritet i fortë pasi është periudha ku turizmi jep kontributin më të madh.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.