Portugalia, në shtetrrethim gjatë natës / Varianti Delta po rrit infeksionet tek të rinjtë e pavaksinuar
Një shtetrrethim gjatë natës do të vendoset në shumë rrethe të Portugalisë, përfshirë kryeqytetin, Lisbonën dhe Porton, ndërkohë që autoritetet po hasin vështirësi për të kontrolluar rritjen e infeksioneve me Covid-19. Shtetrrethimi nga ora 11 e mbrëmjes deri në 5 të mëngjesit, që nis këtë fundjavë, do të vendoset në 45 zona me rrezik të lartë, përfshirë në magnetin e turistëve Albufeira, në rajonin jugor Algrave.
Rastet ditore në Portugali janë rritur me 2,449 në 24 orët e fundit, që është norma më e lartë që prej mesit të Shkurtit. “Nuk jemi në rrethana për të pohuar se e kemi pandeminë nën kontroll”- tha ministrja e kabinetit, Mariana Vieira da Silva, duke shtuar se është koha për të shmangur mbledhjet, festat dhe ndjekur rregullat. Rastet e reja po raportohen kryesisht tek personat e rinj të pavaksinuar.
Autoritetet kanë përshpejtuar fushatën e vaksinimit për të trajtuar rritjen e rasteve, me ata në moshë 18-29 vjeç që do marrin vaksinën në javën e ardhshme. Njerëzit në Lisbonë, ku janë përqendruar shumica e rasteve, duhet të prezantojnë një test negativ të koronavirusit, ose një vërtetim të vaksinimit, për të dalë apo hyrë në rajon gjatë fundjavës. Brenda 45 rretheve ku do ketë shtetrrethim, puna nga larg është e detyrueshme dhe restorantet dhe kafetë do mbyllen në orën 22:30. Në 19 nga 45 rrethet, ku përfshihet Lisbona dhe Albufeira dhe rreziku është shumë i lartë, restorantet dhe kafetë do të mbyllen në orën 15:30 gjatë fundjavës. Në total, Portugalia, që ka vaksinuar rreth 31% të popullsisë, ka një total prej 882,000 rastesh dhe 17,101 vdekjesh që kur ka nisur pandemia. Autoritetet kanë fajësuar variantin Delta për rritjen, variant që zë thuajse gjysmën e rasteve të reja në vend.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.